Ова транзитивно искуство треба да се разликува од постпородилната депресија, која новите мајки исто така често ја доживуваат. И не се работи само за личното доживување на мајчинството, туку за повеќеслојна психофизичка транзиција низ која поминуваат сите мајки.
Што е матресценција
Кога би изнесувале проценти за да ги поткрепиме фактите, би заокружиле на 100. Бидејќи, сто проценти од мајките доживуваат матресценција, исто како што сто проценти поминуваат низ пубертет и адолесценција. Заедно со бебето во стомакот, се развива и мајката и се раѓа заедно со бебето. Тој развој и прилагодување траат цел живот, само што обично веќе не се толку драматични како на почетокот.
Стручњаците укажуваат на тоа дека периодот на матресценција често започнува и пред бременоста со самата намера за создавање семејство. Во бременоста транзицијата продолжува, како и по породувањето. Идните и новите мајки се соочуваат со драстични физички, хормонални и емоционални промени поврзани со бременоста и мајчинството.
Но, за разлика од адолесценцијата, која е поврзана со еден животен период и се доживува само еднаш, низ матресценција поминувате повторно со секоја нова бременост.
Научните податоци за матресценцијата покажуваат:
- Сивата маса се намалува во одредени делови на мозокот, додека во други се зголемува.
- Амигдалата се зголемува до 15 проценти, засилувајќи ги емоционалните реакции.
- Невронските патишта се репрограмираат, создавајќи нови обрасци на мислење, однесување и идентитет.
- Хормоналните бранови им парираат на оние од пубертетот и менопаузата.
Тоа е време кога женското тело се менува заедно со личниот и општествениот идентитет. Жените поминуваат низ транзиција која не е без амбивалентност и анксиозност. „Матресценција“ е многу соодветен збор токму затоа што ја следи истата јазична структура како и адолесценцијата.
Извор: lummi.ai
Усвојување на новиот поим
Неодамна, две компании фокусирани на мајките апликацијата за заедница Peanut и брендот за грижа за родителите Tommee Tippee покренаа кампања за усвојување на новиот термин. Ги повикаа лексикографите, вклучувајќи го и Merriam-Webster, да го додадат терминот „матресценција“ во речникот и да престанат да го означуваат како погрешно напишан. Компаниите имаат за цел да ја „решат културната слепа точка која остави генерации мајки без назив за една од најзначајните транзиции во нивните животи“, се наведува во соопштението за медиуми. Всушност, 67% од мајките анкетирани од Peanut никогаш не го слушнале тој термин.
Терминот postpartum (постпартум) засега е најприближен, но нов, официјален термин може да биде значаен. Кога нешто именувате, го нормализирате. Именувањето на најважниот период во животот на жените порачува дека нивната трансформација во мајчинството е реална, видена и значајна.
Зошто матресценцијата е важна за мајките
Реалноста на мајчинството често се игнорира или се прикажува во екстреми. На едната страна е среќната мајка вљубена во своето бебе, а на другата мајката која страда од постпородилна депресија. Како едното да го исклучува другото. А кога разговарате со други мајки, ќе дознаете дека не сте осамени во своите чувства од двата краја на спектарот.
Многу жени сакаат да бидат мајки, додека истовремено чувствуваат дека тоа е нивната најтешка задача од која нема одмор. Некои трудници со возбуда ги прифаќаат сите промени во бременоста, иако тие тешко им паѓаат. Додека некои мразат сè што се однесува на бременоста, а сепак ги обожаваат своите бебиња. И секако, сите понекогаш толку се уморуваме од мајчинството, што секое обожавање и одушевување заминуваат во втор план. Понекогаш се прашуваме кога и дали некогаш повторно ќе изгледаме или ќе се чувствуваме како „онаа старата“. Книгите за родителство главно зборуваат за грижата за детето и слабо ги доловуваат спротивставените и измешани чувства кои сите мајки ги доживуваат.
Жените често стапнуваат во мајчинството со нереални очекувања и исто толку често биваат потресени од својот емоционален одговор на искуството. Било да е во прашање недостиг на сон, проблеми со доењето или притисокот од грижата за беспомошното новороденче, новите мајки стравуваат дека не се дораснати на задачата. И се плашат дека ќе развијат постпородилна депресија. Меѓутоа, најчесто се работи за интензивно доживување на матресценцијата.
Разлика помеѓу матресценција и постпородилна депресија
Бидејќи ни недостигаат официјални сознанија и едукација за матресценцијата, таа често се меша со постпородилната депресија. Постпородилната депресија е состојба која ги попречува секојдневните функции. Новите мајки имаат проблеми со спиењето на начин кој не е поврзан само со грижата за новороденчето. Таа може да донесе губење на апетитот или негово драстично зголемување. Може да се чувствувате безнадежно, забавено. Ако мислите дека имате постпородилна депресија, секако консултирајте се со лекар.
Но, емоционалната и психолошката разнишаност во повеќето случаи е искуство на матресценција. Со усвојување и нормализација на овој концепт, би можела да се намали изолацијата поврзана со мајчинството.
Како да се носите со транзицијата на мајчинството
Еден од најлогичните совети и најтешко остварливите е да издвоите време за себе. Направете список на сè што сте биле или сте правеле во својот живот пред мајчинството. Разложете го тоа на сегменти кои се однесуваат на телото, односите и личниот живот и обидете се да практикувате нешто од тоа, колку што можете.
Мајките на новороденчиња можеби мора да бидат креативни или да се потпрат на поддршка од пријатели, семејство или платена помош за да издвојат време за грижа за себе. Малите моменти како туширање, вежбање или вечера со партнерот можат да направат голема разлика. Покрај тоа, поврзете се со други мајки. Разменувајќи искуства, ќе се уверите дека не сте сами во своите превирања и дека вашите амбивалентни чувства се вообичаени и нормални.
Културолошки постои очекување дека блаженството ќе биде примарна емоција. Повеќето мајки наоѓаат моменти на радост кои се менуваат со периоди на стрес. Што повеќе зборуваме за матресценцијата, мајките ќе се чувствуваат помалку изолирано.
Извор: easylife.rs
